ഫാര്‍മ ഫാക്‌ടറിയില്‍ വിഷവാതകം ശ്വസിച്ച് ഒരാള്‍ മരിച്ചു
Thursday, November 28, 2024 2:27 AM IST
അനകപ്പള്ളി (ആന്ധ്രപ്രദേശ്): ഫാര്‍മ ഫാക്‌ടറിയിലെ റിയാക്‌ടർ വൃത്തിയാക്കുന്നതിനിടെ വിഷവാതകം ശ്വസിച്ച് ഒരാള്‍ മരിച്ചു.
അന്ധ്രപ്രദേശിലെ അനകപ്പള്ളി ജില്ലയിലെ പരവാഡ ഫാര്‍മ സിറ്റിയില്‍ സ്ഥിതി ചെയ്യുന്ന സ്വകാര്യ കമ്പനിയില്‍ ചൊവ്വാഴ്ച വൈകുന്നേരം നാലോടൊണ് അപകമുണ്ടായത്. ഒഡീഷയില്‍നിന്നുള്ള ഫാക്‌ടറിയിലെ സഹായിയായ അമിത് എന്ന ഇരുപത്തിമൂന്നുകാരനാണു മരിച്ചത്.
ഹൈഡ്രോക്ലോറിക് ആസിഡും (എച്ച്സിഎല്‍) ക്ലോറോഫോമും കലര്‍ത്തുന്ന റിയാക്‌ടര്‍ വൃത്തിയാക്കുന്ന തൊഴിലാളികളാണ് അപകടത്തില്‍പ്പെട്ടത്. ശാരീരിക അസ്വസ്ഥത പ്രകടിപ്പിച്ചതിനെത്തുടർന്ന് ഒമ്പതു തൊഴിലാളികളെ ആശുപത്രിയില്‍ പ്രവേശിപ്പിക്കുകയായിരുന്നു.
ഗുരുതരാവസ്ഥയിലുള്ള അമിത് ഇന്നലെ ഉച്ചയോടെ മരിച്ചു. സംഭവത്തില്‍ കമ്പനിക്കെതിരേ കേസെടുക്കുമെന്നു പോലീസ് അറിയിച്ചു.